من فيلم حرام عليك
إسماعيل: طب، البسها كده وريهالي؟
عبد الفتاح: إشمعنى؟
إسماعيل: إلبسها كده وريني! بشرف والدتي أنت شكلك كده أحلى.

من فيلم حرام عليك
طفلة: شوفتي يا ماما، مش الراجل ده شبه القرد اللي في جنينة الحيوانات؟
الأم: أسكتي يا بنت لحسن يزعل.
طفلة: مين؟ القرد يا ماما؟
إسماعيل: لأ ياختي والده.

من فيلم إسماعيل يس يقابل ريا وسكينة
فلفل: إعمل معروف سيبلي الفلوس، مش كفاية أنك لطشت المحفظة؟!
الحرامي: محفظة؟! ومسميها محفظة! ده أنت ماعندكش دم! ده ما كانش فيها غير نُص ريال أعمى!
فلفل: ولما نص ريال أعمى، خدته ليه؟! عشان تركبله نضارة؟!

من فيلم إسماعيل يس في البوليس
عبد البديع: مالك؟ تعبان؟
زكي: ماشوفتش أبدًا جحش صغيَّر جارِر عربية كارُّو محمِّلة، وبينهج في مطلع؟
عبد البديع: لا، ما شوفتش.
زكي: (يشير لنفسه) اتفضل شوف.

من فيلم ابن حميدو
حميدو: تطلع إيه دي يا باز أفندي؟
الباز أفندي: ولا أعرفه!
حميدو: تكونشي شوكلاتة؟

من فيلم إسماعيل يس طرزان
نمر: يا سلام يا شيتا.. أنا النهاردة بس عرفت إيه سبب تعاسة الإنسان وسعادة الحيوان.. قولتيلي إيه؟ مظبوط.. الفلوس.. الفلوس هي اللي بتعمل الفوارِق الاجتماعية بين الناس.. الفلوس هي اللي بتخلي الناس تتحشر في كل شيء حتى الجواز، ولو إن الجواز ده من اختصاص العريس والعروسة بس.. الفلوس هي اللي بتعلِّم الناس قِلة الأصل. قولتيلي ليه؟ أقولك ليه، ولو إنك لا قولتيلي ليه ولا حاجة.. مثلًا بيقولوا كل واحد يعمل بأصله.. ولو إن البني آدم مابيعملش بأصله أبدًا لأن أصله قرد، هما بيقولوا كده. أهو مثلًا عندنا في الغابة، الحمار لو حَب حمارة، مايجيش أبو الحمارة يدبحها ويشرب من دمها.. الثور مثلًا لو حب ثورة، مايجيش مثلًا في يوم من الأيام يفتح شنطتها ويشوف صورة ثور تالت، ليه؟ لأن فيه أمانة.. فيه شرف.. فيه إخلاص.. علشان كده أنا لازم أخلَّص صافي من الجو الإنساني اللي هي عايشة فيه.